Skip to content

*Ma’di Language*

Table of Contents

#1.  Open air preaching at a market in Moyo town and the Laropi Nile River Ferry Crossing. Preacher-Jacob Lee-Translation- Abraham Aluma

#2. Quest For Joy by John Piper. Permission to post given by Desiring God Ministries .

#3.  The Cost of Discipleship: Luke  14:25-35  by Jacob Lee

Ma’di translation work was done by Michael Dricille from Metu Mountain North Uganda…thank you Michael! The excellent layout work on the Madi Quest For Joy tract was done by graphic designer Dan Thompson. Doug Salser with  Literature Ministries International  helped spearhead this web edition as well as a print edition. Many thanks to Dan and Doug!

——————

——————

#2: Quest for Joy (Madi)

(English Version)

Quest for Joy pg 1

Quest for Joy page 2

Quest for Joy page 3

Quest for Joy page 4

Quest for Joy page 5

Quest for Joy page 6


© Desiring God

Permissions: You are permitted and encouraged to reproduce and distribute this material in any format provided that you do not alter the wording in any way and do not charge a fee beyond the cost of reproduction. For web posting, a link to this document on our website is preferred. Any exceptions to the above must be approved by Desiring God.

Please include the following statement on any distributed copy: By John Piper. © Desiring God. Website: desiringGod.org

—————-

#3: Ta ruledi lini hwejo `ba Rubanga dri rini ri `i

Jacob Lee

Luka 14:25-35

  • Idoka
  • “Ba amgbu oko ana vu ni tro” dii `ba ana vu okoka ri `bati `i= “ana ma’ju ti `i” A`dusi?
    • Nyuma ana idele risi (Ani Li’ja, ta cidru dri `i); driaru okpo ori unzi drojo rii aa; vua ka layu hwe `ba vu aseka rini; vua oza amba cidru dini dri  ndreka ri ‘bati `a mi wa; nza nza rii; karuni ani laponyi retu ri `i (“awi” le’jo Rubanga dri rii); aaru ite`deru ani Rubanga `a Ngwaapi `i, vua Laponyi `i; kole `ba cidru kole ani ndro…
    • A`dusi? nyi Yesu `a vu ni oko au ya? Endru nyi dia di…a`dusi? Alua ri ani ama `i lofo dia endru sa `ba ziti `aa okoki Yesu `a vu ni au ku ki oluki dri le’jo erire bi si ga. Ru endru cidru di `a ni ama Yesu ni leka ndro si, ale laru hwele anini, ama gbadru ani ndru, vua ale ameri ana uduku ni le’jo driaru risi. Ki ama ziti evu di `a lati le’jo si (uraru dri `a ra); loso rii amani ma familia tro, a`dusi ale vu di ndreka, taziti tro.
    • Yesu `a ogu ecore ana ta jore laki dri rii Eco ogu ojo ta amadri sa tro. Anyi endru baba ana le’jo ni erirega vua ta ana mbare ga `i ya? “ma`di bi tro ta erire ga rii , koso bi oga keri” vs.35
    • Le`jo `a rongo rongo ti `i
      • Le’jo ndutu Yesu `a jole rii le’jo anda dri ri `i, ki tete ta `baa lele ai keri ta driaru rii ku. Ondre ta ina di bati “karide kpe” ndrole le’jo sile oru ledi bati si `i (vs’s 26, 27 & 33).  Alusa ecoru jo’joadru, “Jo ipe olule `ba ma vu okoka ri `bati `i dru vua jo anyaci andraga ma vu ni okoka tro ri ma tutu retu rere ri co anya dri ga ra ni kuru. Ojo anya oluka `ba ma vu okoka riisi ahwe tete ta anya lele rii au a`dite ku ki ma ba anyi engwi limi ataka `ba isa kuru. Ojo maba anyengwi ta tro rere vua maba ta anya urale anya oluka Amerika `ba si ri kengwi ce isa kuru.  Ojo ma anya driluci aa ri du cidru pi, maba egbe kolu anyietro ni, vua maba `ba cidru ka anyini laru hwe anya ma vu ni okoka au si au ni kuru. A`dusi ale anyi ndro, vua muba ta loso ria tini anya lidri ni ra isa ojo ta driaru kuru!”
  • Kesu jo le’jo anda ri kolu le’jo sile oru ledi iga aa sa, taziti rusika ri ka `ba dri se ego rere vua ta rujoka laka ri bati isa ego. Ka ta jo `ba asiti aidri rii lidri di idri adute ri `bati ni. OO, Rubanga ole ama gbadru ndro rere vua uba ta loso riisa a tini amani ra. Ki, anyiba obiki kare mgbo ana tutu amani rii a`du ya dri di su le (Lejo di osiru kare liele di iga: http://www.desiringgod.org/Blog/1736_corrective_tract_for_the_prosperity_gospel/ ). Nosi ana tati ubale ri iga icandi/sikia tro vua ta ako sa kolu aa ni wa. Anyera le’jo Yesu `a jole Yoana 15:18-20 ga rii au ojo a`du? “Jo `ba vudri rii ole anyii ku, mgbesa anyera oleki ma sa ma ku ni ati. Kesu anyolu `ba vudri di `a ri `i, `ba vudri dia ri ka anyi le kendre `ba aidri ani; ki mupe anyi `ba vudri di `a ri `ia ra, anyi `ba aidri `i ku, dii ondo le’jo aia anyi lejo ku ri `i. Anyera le’jo majole anyini andrani rini: ‘Tiluza onde ana amba ni ku.’ Jo kejiki sikia maru wa kite’dea kaki sikia eji anyiiru sa ra…” vua “Ohwe anyini andra loso te Kristo ni a`ika si a`dite ku, ki ricandika ani si si sa tro” (Filipi `ba 1:29). (Nyindre ziasa: Ofu erijoadru Timoteo `a sile rii. 2:3; Eberei. 10:32-39; Ofu atijoadru Petro `a sile rii 1:3-9, 2:21 vua amgbu ziti jole kuru ri tro). Le’jo diani dii ziti  si ka ‘ba dri se ego a`dusi kite’dea Rubanga ni nyini ki nyile nyi Rubanga ni ku. Andre icandi atijoadru unzi rere rii ama adrunzi amvonzi tro Opi ni a`ika ra Pakisitani `a ria esule ri `i. Ta cidru Yesu `a jole ri iga “ga ani iyo.”  A`dusi ta cidru ana jole amani rii di ama ana vu ni oko ingoni ya `i. Oba nyi tema sa emule nzule zo tro vuru ku.
  • Yesu ebu le’jo ehwi/odo tro/ovidru au ta driba nzejo le’jo anda dri ri idri ‘i.
    • Lini dii cidru driba ani onzeru le’jo ehwi si, Ovidru le’jo ehwi Karama retu ridri `i vua le’jo ehwi Bilo egwedi di ridri `i.
    • Dii lofo sa le’jo ehwi zi ciri ciri rii eri aa, dii jo oru rere ri sika ti Opi yadi o`ja ga ri tro.  E`bu le’jo  ehwi a`i dri rii au.
    • Yesu ohwe lini anda dri rii ana le’jo ehwi/ai dri anda `ba jidi `baru rii ebuka au si. Dii ewo le’jo Rubanga dri rini engwijo amani lidri ri `i (Ondre dri Eberei. 4:12 ni au). Laponyi loso ri `bati cidru ka di ide au, ovidru laponyi Matimatiki inidi ri ka odo eta au.
    • Le’jo jole dia ehwi ni: Ta cidru idele Yesu ni rii kole ide asi cidru si.  Kole Yesu kolu ama lidri ni `a tesa ati. Maju Yesu dri rii kole kolu ra alu si, kole koba tazi komba ana andraga Yesu `a vu ni okore ga ku.
  • Ana ciri ciri 26 `i
    • Kole ta ama lele risi airu tesa “ta ama gale mgbe ri tro ku”, ndrole ta ama lele ku hwa rii, rupeka ta ga, reruka, a’lu tro vua ta ziti tro., vua ziasa tro kole odu ta Yesu `a jole rii “rekaa vuru” si ku, kusa bakaa kohwe ilonyi `baziti ni, kusa amani konde Yesu ni ra si ku.
    • Yesu eri le’jo dia ehwi ni ingoni vua le’jo zi `bati Le’jo Rubanga dri ri `ia ri ka driba ani nze ingoni.
      • Yesu ti laki rutraka ri tro oni ta lungwe ama Ofu O`ku ri ungwejo ri idri ote. Oniki odo Yakobo nidri, Lia nidri vua Rakele nidri riisa ote. Idoka 29:30-31 ga ojoru, “…Yakobo `a Rakele ni leka ndro rere   ana Lia ni ndeka ra si ide ebu Lebani ni kinya tuderi Rakele koludru anini izi dru si. Ki Rubanga `a ndrekaa Lia ni ole ku si awi otijo driaru ria ti ni mgbo, oko oba Rakele le oe ondo.” Ewo ajiri esi Yudei `ba dri, `a ehwi leka asi `a nidi dri rii ehwi ani ana le ruaru rii ga `i. Dii ondi `ba ezesa le’jo Yesu `a nzele ri erika bisi ri `bati `a ovi ta Yesu `a jole ri erijo ri `i.
      • Ewo zi ga Bugu Ole ri ini amani kole amale ama uku ti, ama `baciri ti tro ndro vua kole amale ama o`ja`bazi ti isa ndro. Le’jo ani sile  Mateo. 10:37ga di iga Yesu ojo, “Ma`di ana ata ti endre tro le`di ma nde`di ra rii, mani konyi ako, ma`di ana bara ti ledi ana zaa tro ma nde`di ra rii, esi mani ku. (Inzajodru: izi, zaa/`boronzi izonzi i`joka rii, e`i, anzo tazibati tro, ka anzo hwe Opi niti kpe.)   Ma`di ana Kuruce ni du`di ku vua ma vu ni ko`di ku rii a`i ma asi si ku…”
        • Kristo `ba cidru anda ri ka aia uku ti le `baciri tro ndro, vua kaki aia wadezi ti isa le ndro,  a`dusi jo ani ma`di Kristo `a inile ri `i kolea kondre tadii gba ili nosi ka ai  le“ Asi `a”, ka ai le ga. Koloso `ba. 1:18 ojo tacidru `a kole Kristo kendre tau!
        • Ovidru, vu amgbu ga engwijo ma`di kare na iga ri `i dru kole ma`di koga kare anidri nai mgbe koko ka`i kare ani laka na `i au. Amasa esu kole ama `i Amba amba cidru dri vua Opi opi cidru dri dii au ku ya?
      • “Jo ma`di oga…oo, nosi gba ana lidri isa masi ku `i” Kendre ana rujoka ra ri ani: “Ma`di kolu hwa alusa ma`di ma vu ni oko`di riidru kpe jo ole ani anangasi onde ma ra `i”
        • Bugu Lete dri ri `ia ta ojoru ovi aia ori unzi ri ndejo ri idri  pelere ojoru“…aziki ai dra ni”.
        • Ki jo eca Yesu `a vu ni okore ga kole hwa alusa ojoki: “Di le teke tro vua unzi rere ni ku”. Jo Yesu ka ama ungwe kolea eriki vua kare ana ama ungwere ri iga kolea ovuki! John Paton, ni ofu loso Rubanga dri ri jidi kare liele (Seas Islands) dri iga rii oni wale ri apa ani idrale ni ojo, “A’tu ibo zajo rii ondi oru ma mgbajo oni wale oru ma dijo ri tro, ki Rubanga eco ra nai ra. Oceki ama tini kare dra dri iga, `ba aarii kuza ausini `baziti aa riisa ka oni wale ati kusa ondo mgbale ati ria vu ni angwa si. Mgbesa ma asi era Opi Yesu ni au; andre ta cidru ride`di dii ndre. Egbwe aku ma kendre eri enga`di Rubanga dri ri ani. Ara risi ma kpo paka amba madri ri ide ana e`bu ni ma lidri ni `a kpa…” (peiji. 206-207 dii ta driba nzele ana lidri nidri ri `i).
        • Carol, ni ma izi tro, amasa adri rumwire ama lidri ni a lazi ani di tro, adri ama ama zi amangasi ama oluka Opi ni `a si tacidru amadri aa rii Opi `a `i  ya vua di ai cidru anini ya `i. Udiangwadru meri ma`dizi alu odri ka ta jo Rubanga dri ojo, “O`du zi alu lidri madri `ia azi ma mangasi, mide tazi oludi mani andraga tadru rii ra ya. Ta ma aza’jo andraga wa rii a`du?” Amala, bu `a ama endri ti ole ole tro oleru ni di `i!
      • Anyiba mazi dri lazi `ba asiti nyo’di rini (lokudru ka `ba asiti nyonyo). AMa oluka Kristo `ba si kole tesa ta ama urale idele rii amide au ya? Ta te ama urale rii kole kolu anda, anzo, vua tacidru ruhwedi amani ri tro ya? Lidri ama olujo Kristo `ba rii kendre ta konyi hwe`di mugati ni mwajo ku ri ani ya kusa lidri loso ama olujo Kristo ni `a ri koba ama okolongo amadri ri ebu, saa amadri ri tro, drilahwa amadri ri tro, kusa dride amadri ri hweka si  jo tee amandru kusa amandru Opi Rubanga dri rii ku sa `i ya?
      • Lazi ziti lubi dru `ba asiti nyodi rii: (Source: Tim Keller’s osi bugu driaru ungwele Egwe`di di) ni a. Lazi laka ri oziru di ani,
        • Nya lidri ga ma`di kusa ta ati rii a`du
        • Ta nyini konyi tro nza rii a`du
        • Ta nya ebule nya lidri ga palanda rii a`du ovidru siti isa laka   dru `I
        • Nyi ta ra nzanza na a`du dri?
        • Anzo nyidrii nza nza ani a`du kusa ka nyiko a`dusi?
        • Jo, nyindre nya asiti ni urata nyidri ri tro ni, nyesua ta nya lidri ni `a atijoadru rii Rubanga `i ku, disidru kole nyeco ta nya lele ri `bati, nyini lidri olure tadru ri esujo ‘i.
  • Ana ciri ciri 27 `i (Ondre vua Luka 9:23-25 isa tro)
    • Yesu ninga, `ba esule enzi tro ri `bati kole duba konzi kuruce ai epajo rii kare ai epajo ri iga. `Ba ai dii a`di ai uri ta ma’ju Kristo dri ria idele a`i si Yesu ni ri idere ga uri.
      • Ma`di anda Yesu `a vu ni okodi rii kole duba kai ru lou, drinza tro, vua sikia tro ejile ana ruga rini  ra (kole ma`dizi kide tadii ni ku) ani Kristo dri ri kidea dini rii ana Kristo ni leka ndro vua ana e`bu driaru ri ideka au si.
      • Ma`di anda Kristo `a vu ni okodi au rii kojoa ru Yesu dri ri ate tri lari esujo `i vua ka rai  Majugo Paulo tro kojoa, “Ta cidru ma esule rii migwe cidru Kristo si.  Lokudru, ta cidru oe mani konyi ako ma le kiza tro retu Yesu Kristo ni ma Opi dri ri nika si.  Anisi oba  ta cidru engwi mani konyi ako, ausi Kristo kengwi dru mani konyi tro si…”. Ma`di Yesu `a vu ni okodi ri ka tadi jo asiti okpo tro, a`dusi nikaa ote, vua amakaa ra o’bi ama Yesu ni si… a`dusi anzo ama acijo Yesu tro rii ta ruledi Kristo `ba cidru ni olujo ingwe Yesu dri ri `ia ri `i. E`ku ka tesa ruhwe Rubanga ni jo amesu tacidru ama lele rii anisi vua anini a`dite `i! (aka John Piper)
    • Dii ovi “o`du cidru si” ama kuruce amadri ri nzijo ri `i (Ondreki dri Luka. 9:23 ni au).  Ama draka ru si o`du cidru si ni ta e`ku retu ti eji`di Yesu ni ta cidru za`di ra ri `i vua tadii kole kideru lidri `ba Yesu `a vu ni okoka ri `bati dri i`a o`du cidru si.
    • Ta loso rujodi le’jo angwa ani sile di iga rii di `i “Jo ma`di ole ola ani `ba madri `a alu `i dru, kole kora ani dria ku, ka’i ru lou, drinza tro, vua sikia tro ru madri risi rii au—saa cidru si, vua saa cidru `a—vua kole kaci andraga ma vu ni okoka ma’ju ani tro. Kole koba ani olule ma`di ma vu ni okodi riidru” W. Hendriksen
    • Nyi Kuruce nyidri ri nzi o`du cidru si ya? Di kesua zi`bati si ka o`du ji amgbu  vua zibasi ka kinya du amgbu nyini e`bu idejo Opi ni a`i si, kusa nyini le’jo jojo kiza si `i, nyini ru lou mi jo—ru si vua laza si, vua zi `ba si `baziti ondre tadia rideka dini ni ku. Ki Yesu ka ta `di ndre ote, a`dusi ka nyi eco ra koba nyaci nya kuruce ni duka vua nya ana vu ni koka tro andra ga… Yesu kojoa nyini, “Ande ta loso ri ideka si ku a`dusi jo nyande ku saa nya lwajoadru ri kemu keca ra vua o`du nasi nyemu nyi dride nza ri esu au.”
  • Ana ciri ciri  28-32 tro- Le’jo ehwi ciri ciri eri rii-Eritruwa ka konyi hwe ra dule anda si riiga.
    • Ma`di jo sidi rii-kole ati koni ka okolongo le ingopi ya ni ote
      • Ma`di ni engwijo ma`di Yesu `a vu ni oko’di riidru kole ati ma`di koni ta ruledi rii ote.
      • Yesu ole asi bale ta ga ga rii ku.
    • Opi ga-ma`di kolu ra duka ako ni kpe.
      • Kendre le`jo ehwi jole ledi iga ma`di ka ra du wa jo si jo kusa jo sijo ku ri ani. Mundara 20,000 evu oja ga Amba dri vua esu ana asikaria a weli ni tete 10,000.
      • Kole amba di kodu ra! Kole asi na komba okpo. Ciri ka okpo hwe amba dini mbajo ta ana idele ri ia ra. Alua ri ani kole enzi`dipi kolu ciri tro anini tileci remujo alu Rubanga tro  ri esujo `i.
    • Le’jo ehwi eri ri onze ta driba ovi eri siaidii eritruwa okpo rere. A`dusi le’jo di oba Yesu ojo:
      • Anyiri vuru vua anyira le’jo dia `a ni jo anyoko ma vu ni kpe sa `i`.
      • Jo ile ma gaka mgbe sa kole anyiri vuru anyira `a ani kpa.
  • Ana ciri ciri 33-35 “Ni dria…” Ta a angwa ka.
    • Ojoru inajoadru riiga “karide kpe `i”
      • A`dusi kole tacidru kideru Opi `a lekaa ri ani-“kole ma`di koga tacidru unzi ana lidri niga rii mgbe”
      • John Piper osi, “Ta nyidri kusa nya ruga ri Gaka a ehwi ni kole nyazi ta nyidri aa rii cidru ra `i ku. Yesu ni anzo oko Zakeo `a ewo ana ta esule ridri ri hweka icandi `ba ni si ci. Ki ta ziti gaka a ehwi ni tacidru amadri ria oluka Yesu a driga vua ana ai hweka amani taa mbale ama le`jo ana le dri ri erika si `i.”
      • `Ba Yesu a inile rii ‘ai vua tete “loso rii ‘ai `i” (‘ai dii ka ritiri da) jo `badii Kristo ni a kaki le driaru ria vu ni oko vua kaki ani le asi cidru si”.
      • Le`jo sile di iga Yesu oga `bani oluka `ba ana vu ni okole riidru ni kuru ki ta ana lele rii ole `bacidru koni ta rule’di ma`di ni olujo ma`di ana vu ni okodi riidru rii a`duya ni ote.
        • Ekelezia zi Scotland a riiga, tazi aninga ojoru la`du dri ojo, “Kole ‘ba koto ladu a epe mbeli ku, kusa ra hweka ako ku ki kole kolu u’je retu ri tro, laru tro, vua ori Rubanga dri ri tro.”  Alua ri ani razika Yesu a vu ni kojo isa kole kideru igeni retu ri tro vua ori Rubanga ni orijo ri tro.
      • Ama cidru ‘ba Yesu a vu ni okoka ri ‘i/’ba ma’dizi kusa tazi vu okoka ri ‘i.
        • Ki jo nya’i Yesu ni kuru… Jo nosi iri kare ra duka ako riiga idu driso ra kuru, ale mahwe nyini ra nyini engwijo o’du disi ma’di Yesu a vuni oko’di riidru. Nya’i Yesu ni nya asiti cidru si nyini lari esujo, vua nyeco ogu enzi cidru nya idele ri iga. Nyihwe tacidru nyidri rii Yesu ni!!
        • Ki anyi ziti dria dini sa ma’ju Yesu dri ri ‘i ri ‘bati, ale majo anyini anyibi asiti cidru si olule Yesu ni ‘ba ana vu ni okoka riidru anyide tacidru Yesu ni. Anyiga ziniga sa tacidru unzi anya lidri ni ga rii mgbe…anyijo Yesu ni ile ani ndro rere si onde ta cidru ra vua anyibi olule kiza driaru risi adusi ani ma’di lidri hwe’di tacidru ni ri ‘i!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Follow

Get every new post delivered to your Inbox.

Join 71 other followers

%d bloggers like this: